تاند:( یکشنبه ، د حمل ۲۷ ) د ملګرو ملتونو د بشردوستانه چارو د همغږۍ دفتر (OCHA) خبرداری ورکړی، چې د مرستو کمښت او په تېرو ۲۵ کلونو کې افغانستان د قحطۍ له ستر ګواښ سره مخ دی.
اوچا په یو لړ ټویټونو کې اعلان کړی، چې په افغانستان کې د بشردوستانه عملیاتو لپاره تمویل په کمیدو دی چې د ملیونونو ژوند یې له خطر سره مخ کړی.
دغه نړیوال سازمان زیاته کړه: په ۲۰۲۳ کال کې له افغانستان سره د مرستو لپاره له پنځه سلنې څخه کمې مالي غوښتنې شوې دي.
اوچا وویل چې د افغانستان کړکیچ په نړۍ کې تر ټولو لوی او جدي بشري ناورین دی، خو په دغه هیواد کې بشري عملیات تر ټولو کم مالي مرستې لري.
د ملګرو ملتونو د بشري مرستو د همغږۍ دفتر ټینګار کړی، چې په افغانستان کې له ۲۸ میلیونو ډېر خلک بشري مرستو ته اړتیا لري.
د ملګرو ملتونو د شمېرو له مخې، په افغانستان کې شاوخوا شپږ میلیونه وګړي د خوراکي توکو د نه خوندیتوب له بېړنۍ کچې سره مخ دي.