تاند: ( يکشنبه ، د حمل ۲۰ مه) پاکستاني چارواکو ويلي، چې يو افغان یې د خپل هېواد د لومړي وزير شهباز شريف کور ته د ننوتو په تور نیولی.
ويل شوي، چې دغه افغان وګړي په پټه له څو لارو څخه تر تېريدو وروسته ځان د شهباز شريف کور ته رسولی و.
پاکستان د نیول شوي کس په اړه نور جزییات نه دي ورکړي او نه ېې دا ويلي، چې دغه کس مسلح و کنه؟
د طالبانو ادارې په دې اړه څه نه دي ويلي.
په وروستيو کې د طالبانو او پاکستان اړیکې ظاهرا ښې نه دي.
د پاکستان د ملي امنیت شورا د تېرې جمعې ورځې غونډه کې يو ځل بيا وويل، چې د افغانستان له خاورې ورته تروریستي خطرونه دي.
طالبانو دغه ادعاوې په پرله پسې ډول رد کړي دي.