تاند:( شنبه ، د حمل ۱۹ ) د پروان لپاره د طالبانو امنیتي چارواکو ویلي، چې د داعش پر ضد په تازه عملیاتو کې یې د دغې ډلې یو غړی وژلی او درې ښځې او اوه ماشومان یې ژوندي نیولي دي.
د پروان لپاره د طالبانو د امنيې قوماندانۍ وياند محمد کامران زيد ویلي، دغه عمليات تېره ورځ د چاريکارو ښار د “ښوونکو ښارګوټي” په سيمه کې ترسره شوي دي.
د هغه په وینا، په دې عملیاتو کې د داعش یو غړی وژل شوی، درې ښځې او اوه ماشومان چې د وژل شوي کس د کورنۍ غړي دي، نیول شوي دي.
زید زیاته کړه چې نیول شوي کسان له هرات ولایت څخه پروان ته راغلي وو.
ځايي طالب چارواکو د وژل شوي کس د هويت او د هغه د کورنۍ د غړو په اړه نور جزئيات نه دي ورکړي.