تاند:( پنجشنبه، د حمل ۱۷ ) د طالبانو د رژیم د کرنې، اوبولګولو او مالدارۍ وزارت ویلي، چې هېواد ته یې له دوه کیلو څخه د زیاتو وزن لرونکو چرګانو پر راوړلو بندیز لګولی.
د دغه وزارت د حيواني روغتيا او مالدارۍ لوی رييس مفتي ذاکرالله د افغانستان د چرګانو د روزونکو ټولنې له مسوولینو سره په ناسته کې ویلي، د هغو چرګانو واردات چې وزن يې له دوو کيلو ګرامه ډېر وي او دغه راز د هغو هګيو واردات هم بند شو چې له فريزر پرته افغانستان ته واردېږي.
طالب چارواکي وایي په همدې حال کې د چرګانو دانې، هګۍ او غوښې توليدوونکو څخه هم ژمنه واخيستل شوه، چې تر ۳ مياشتو پورې په بازار کې د چرګانو د دانې ټاکل شوې بيه نه زياتوي او د کرنې وزارت سره د کړې ژمنې پر اساس د چرګانو د غوښې او هګيو بيې هم نه لوړوی.
د طالبانو له بیا واکمنیدو سره د چرګانو افغان کاروباریانو شکایت درلود، چې له پاکستان څخه د چرګانو واردات زیات او د دوی کار ته زیان رسیدلی.