تاند:( دوشنبه، د حمل ۱۴ ) د هلمند لپاره د طالبانو د رژیم د پوهنې رياست وایي، چې د طالبانو له بیا واکمنیدو سره د دغه ولایت ۷۵ ښوونځي بیرته فعال شوي دي.
ځایي چارواکو په دې اړه نور جزیات نه دي ورکړي، خو ویلي چې په هلمند کې د عصري علومو د زده کړو د مرکزونو تر څنګ ۱۷۰۰ مدرسې هم شته.
طالب رژیم د هلمند د ۷۵ ښوونځیو د تړل شویو ښوونځیو د بیا پرانیستې خبره په داسې مهال کوي، چې د تېرې ۲۰ کلنې جګړې پر مهال نیږدې ټول تړل شوي ښوونځي د طالب وسله والو د نفوذ لاندې سیمو اړوند وو.
پرزول شوي جمهوري نظام طالبان تورنول، چې د زده کړو خنډ دي، خو طالبانو په ښکاره دا ادعاوې ردولې.
اوس پر طالبانو له دې امله نیوکې کیږي، چې د څو میلیونه نجونو پر وړاندې یې د ښوونځیو او پوهنتونونو دروازې تړلې دي.