تاند:( پنجشنبه، د حمل ۱۰ ) د طالبانو د ریاست الوزراء سیاسي مرستیال مولوي عبدالکبیر نن په داسې حال کې چې د دوی د سیاسي کمېسیون د غړو(خیرالله خیرخوا او انس حقاني) په ملتیا د افغانستان لپاره د ملګرو ملتونو ځانګړې استازې روزا اوتونبایوا او ورسره پلاوي سره کتلي دي.

د نوموړي دفتر په یوه اعلامیه کې ویلي، چې په دې ناسته کې، روزا اوتونبایوا د روژې میاشتې مبارکي وویله وې ویل، له افغانانو سره به د ملګرو ملتونو بشري مرستې دوام وکړي.

هغې همداراز، د افغانستان د ستونزو حل لپاره پر خبرو اترو او تفاهم ټینګار وکړ زياته يې کړه، ملګري ملتونه به په دې برخه کې هڅې وکړي.

مولوي عبدالکبیر له افغانانو سره د ملګرو ملتونو له بشري مرستو مننه وکړه وې ویل، بشري مرستې باید په سیاسي موضوعاتو پورې ونه تړل شي. افغانستان د ملګرو ملتونو له فعالو غړو څخه دی او هیله ده د نړیوالې ټولنې یو فعال هېواد پاتې شي.

هغه وویل: ((  له نړیوالو سره تعامل غواړو، خو ملګري ملتونه باید پر زموږ پر مشرانو او مقاماتو محدودیتونه او بندیزونه ختم کړي، ځکه دې کار د تعامل مخه نیولې ده. په دې برخه کې د یوناما هڅې مهمې دي. موږ ټول شرایط پوره کړي او باید په رسميت وپېژندل شوو.))

د طالبانو د ریاست الوزراء سیاسي مرستیال ډاډ ورکړ، چې افغانستان به د هیچا په کورنیو چارو کې لاسوهنه ونکړي او نه به چاته د افغانستان په چارو کې د لاسوهنې اجازه ورکړي. نوموړي وویل، د افغانستان خاوره به د هيچا پر ضد ونه کارول شي.

مولوي عبدالکبير زياته کړه، دوی په ډیالوګ باور لري، خپلو سیاسي مخالفانو ته یې بښنه کړې، افغان شخصیتونو ته یې د بېرته راستنېدو زمینه برابره کړې او تر اوسه دا پروسه ښه پرمخ روانه ده.

دغه طالب مقام ویلي، چې طالبان په ټولګډونه نظام باور لري او غواړي د تخصص پر اساس ټاکنې وکړي.

هغه دا هم ویلي چې، داعش یو نړیوال ګواښ دی، خو طالبانو یې په افغانستان کې ريښې وچې کړې دي.

د طالبانو دغه مقام، چې تر نورو ځان منځلاری ښيي په ځلونو ورته څرګندونې کړي، خو عمل کې لیدل کیږي چې طالبانو پر خپلو خبرو د عمل په تړاو د افغانانو او نړیوالو باور نه دی ترلاسه کړی.