تاند:( سې شنبه، د حمل لومړۍ) د پښتونخوا په چارسده کې د مشهور فلسفي شاعر خان عبدالغني خان د اووه ویشتم تلین په مناسبت « د غني مېله» ترسره شوه.
دا مېله د عوامي نیشنل ګوند او د غني خان د مینه والو له لوري جوړه شوې وه.
په غونډه کې مختلفو فرهنګي او علمي څېرو د غني خان د فلسفې، شاعرۍ او د ژوند د نورو اړخونو په اړه خبرې وکړې.
د غونډې په پای کې د موسیقۍ پروګرام هم ترسره شو، چې ډاکټر راشد احمد خان، سرفراز خان، استاد فضل وهاب درد او یو شمېر نورو هنرمندانو پکې د غني خان شعرونه له موسیقۍ سره وویل.
غني خان د پښتو فلسفي شاعرۍ سرلاری دی، چې تراوسه یې پر فکر، هنر او فلسفې زیاتې څېړنې شوي دي.