تاند:(سې شنبه، د کب ۲۳) په داسې حال کې، چې د طالبانو د رژیم د چارواکو ترڅنګ د پرزول شوي جمهوري نظام بهرنیو چارو وزیر او په ایټالیا کې د افغانستان سفارت له ایټالیا څخه خپل هېواد ته د مړو شویو افغان پناه غوښتونکو د جسدونو د لېږد ژمنې کړې وې، خو اوس راپورونه ښيي چې د ۷ افغان پناه غوښتونکو جسدونه له بې سرنوشته کیدو وروسته په ایټالیا کې خاورو ته سپارل شوي.
یو شمېر افغان کډوال د تېرې میلادي میاشتې په ۲۶ مه، د ایټالیا اوبو کې هغه مهال مړه شول، چې د ناقانونه سفر کښتۍ یې اوبو ډوبه کړه.
په دغه کښتۍ کې د بېلابېلو هېوادونو لسګونه پناه غوښتونکي مړه شول.
له پېښې وروسته د طالبانو رژیم او په ایټالیا کې له پرزول شوي افغان جمهوري نظام څخه د سفارت پاتې دیپلوماتانو ژمنه وکړه، چې د افغان پناه غوښتونکو جسدونه به هېواد ته ولیږدوي.
اوس سرچینې څرګندوي، چې د افغان سفارت او طالب رژیم د اړیکو د نشتوالي او نورو لاملونو له امله دواړه لوري په دې ژمنه کې پاتې راغلي.
د پرزول شوي جمهوري نظام د بهرنیو چارو وزیر حنیف اتمر هم د یادې پېښې په لومړیو ورځو کې بیا- بیا ژمنه کړې وه، چې د افغان پناه غوښتونکو جسدونه به هېواد ته ولیږدوي.
په ایټالیا کې د خښ شویو افغان پناه غوښتونکو د تدفین په مراسمو کې د ځینو مړو لیرې خپلوانو ګډون کړی و، خو ډېرو نورو څوک خپلوان هلته نه لرل.
د طالبانو رژیم او په ایټالیا کې د افغانستان د پرزول شوي نظام سفیر په دې اړه څه نه دي ویلي.