تاند:( دوشنبه، د کب ۲۲) په قطر کې د نړۍ په پنځمه امنیتي غونډه کې به د افغانستان پر روان او راتلونکي وضعیت خبرې وشي.
په دې غونډه کې چې نن (دوشنبه) د «نړیوال نظم د بدلون» تر سرلیک لاندې جوړیږي، د افغانستان د بهرنیو چارو د وزارت د پخواني مرستیال «حکمت خلیل کرزي» او د پخواني پارلمان د غړې فوزیه کوفي په ګډون یو شمېر افغان شخصیتونو ګډون کړی دی.
د “خلیج ټایمز” د راپور له مخې، په دې درې ورځنۍ غونډه کې به د افغانستان د راتلونکو امکاناتو په ځانګړې توګه د امنیت، حکومتدارۍ او بشري حقونو په اړه ځانګړې غونډه جوړه شي.
په دغه غونډه کې د طالبانو د ګډون او نه ګډون په اړه څه نه دي ویل شوي.
قطر، چې د امریکا په اشاره د طالبانو د بیا میدان ته کولو او لابۍ اصلي مرکز ګڼل کیږي، د دغې ډلې له واکمنیدو وروسته یې بیا- بیا طالبان له امریکا سره د دوحې د سولې تړون په نقضولو تورن کړي او په خاص ډول یې د دوی له لوري د نجونو او ښځو پر زده کړو او کار د بندیزونو مخالفت کړی.