تاند:( سې شنبه، د کب ۱۶) د بلخ د ریل پټلۍ ادارې رئیس “محمد شفیق محمود” وایي په تېرو لسو میاشتو کې له پاکستان څخه ۱۷۵ زره ټنه کچالو، نارنج او تېل منځنۍ اسیا ته د افغانستان د حیرتان بندر له لارې د منځنۍ اسیا هېوادونو ته لېږدول شوي دي.
هغه زياته کړه، چې د افغانستان د اورګاډي پټلۍ له دغو ترانزيټي توکو څخه يو ميليون او ٧٥٠ زره ډالره ترلاسه کړي دي.
په همدې حال کې د بلخ د سوداګرۍ خونې مسوولین او د دغه ولایت سوداګر له ګاونډیو هېوادونو سره د سوداګرۍ په برخه کې پر تعامل او ښو اړیکو ټینګار کوي.
دوی وايي که ګاونډي هېوادونه خپل سوداګريز توکي د افغانستان له لارې بهر ته لېږدوي، نو بايد اجازه ورکړي، چې افغاني توکي د خپلې خاورې له لارې نورو هېوادونو ته ولېږدوي.
د بلخ د سوداګرۍ او پانګونې خونې اجرایوي رییس احمد شکیب اکبري وايي، له ګاونډیو هېوادونو سره د افغانستان ښې اړیکې به د افغانستان او ګاونډیو هېوادونو د سوداګرۍ د پراختیا او د هغوی د سوداګرۍ د پراختیا لامل شي.
نوموړی زیاتوي، سوداګریزې ګټې باید د سیاست قرباني نه شي، ځکه دا دوه مسایل جلا دي.
دا په داسې حال کې ده، چې پاکستان له افغانستان سره د دغه ترانزیت په اړه کوم مذاکرات او پریکړې نه دي کړي.
د پرزول شوي جمهوري نظام چارواکو پاکستان نه، د افغان خاورې د دغسې ترانزیت په بدل کې د هندوستان واګې بندر ته د افغان سوداګریزو توکیو لپاره ترانزیتي لاره غوښته.
د طالبانو له واکمنیدو سره، طالب چارواکي یوازې له دې اړخه د عوایدو په ترلاسه کولو خوشاله ښکاري.
د دوی له بیا- بیا اعتراضونو سره- سره، پاکستان په ځلونو- ځلونو خپلې خاورې ته د افغان سوداګریزو توکیو د لېږد مخنیوی کړی، چې له امله یې لسګونه لارۍ تازه مېوه خرابه شوې او افغان سوداګر سخت زیانمن شوي دي.