تاند: ( شنبه، د کب ۱۳ مه) د ایران د سوداګرۍ د ودې سازمان (TPOI) يوه مشر محمد صادق غني زاده نن په افغانستان کې د دغه هېواد د سوداګرۍ د مرکز د پرانیستلو خبر ورکړ.
هغه وويل، ټاکل شوې چې د ایران یو ۷۰ کسیز سوداګریز پلاوی چې له دولتي او خصوصي سکتورونو څخه جوړ دی، د مارچ په څلورمه د شنبې په ورځ د دغه هېواد د سوداګریز مرکز د پرانیستې په موخه د افغانستان پلازمېنې کابل ته سفر وکړي.
غني زاده وویل، افغانستان د ایران یو له ستراتیژیکو سوداګریزو شریکانو څخه دی چې د ایران له اسلامي جمهوریت سره اوږدمهاله تاریخي او کلتوري اړیکې او مذهبي او ټولنیز مشترکات هم لري.
هغه زياته کړه، په افغانستان کې د يوه فعال سوداګريز مرکز نشتوالى د افغانستان له جمهوري رياست سره د ايران د اړيکو او په تېره بيا په ګاونډي هېواد کې له وروستيو تحولاتو وروسته له عمده ستونزو څخه دى.
د نوموړي په خبره، نن به څه باندې ۷۰ ایراني سوداګر او اقتصادي فعالان د یوه سوداګریز مرکز د پرانېستې په موخه د یوه سوداګریز پلاوي په چوکاټ کې کابل ته سفر وکړي او دغه سوداګریز مرکز به په یو ۱۱ پوړیز سوداګریز برج کې پرانېستل شي.
سرچينه زياتوي، دغه مرکز د سوداګرۍ او اقتصادي فعالیتونو لپاره ټولې اړینې اسانتیاوې لري.
نوموړي وويل، چې اوسمهال په دغه مرکز کې له ٣٠ تر ٤٠ سوداګريزو شرکتونو د ثبت چارې پرمخ وړي.
د طالبانو د ادارې چارواکو په دې اړه څه نه دي ويلي، خو مخکې ېې په افغانستان کې د ايراني پانګوالو د پانګونې د لېوالتیا خبر ورکړی و.