تاند: ( پنجشنبه، د حوت ۱۱) د کندهار لپاره د طالبانو د رژیم د امرباالمعروف اونهي عن المنکر رئیس شیخ مولوي عبدالرحمن طیبي خپله د دغه ولایت یو شمېر ورزشي کلپونو، سلمانیانو او نورو سیمو ته ورغلی او خلک یې د خپلې ادارې د اوامرو د نه عملي کولو له امله ګواښلي.
د طالبانو د رژیم ولایتي ادارې ادعا کړې، چې نوموړي خلکو ته« په نره لهجي شرعي لارښوونې» کړي دي.
نوموړي خلکو ته ویلي، چې د دوی په اوامرو ځانونه برابر او د طالبانو د مشرانو اطاعت وکړي.
ویل شوي، چې د طالبانو دغه چارواکي د ګمرک ریاست مامورینو او یوشمېر ترافیک پولیسو سره هم د هغوی په دفترونو کې لیدلي او ورته خبرداری یې ورکړی.
د طالبانو د رژیم ډېرې ورته کړنې لومړی له کندهار ولایته پيلیږي.
اټکل کیږي، چې په نورو ولایتونو کې هم د طالبانو چارواکي نور خپله د خلکو د ګواښلو او تهدیدولو لپاره د هغوی کار ځایونو ته ورشي.
د طالبانو د امر بالمعروف اداره د دوی له تر ټولو زشتو او متنفرو ادارو څخه ګڼل کیږي، چې خلک د دوی په ورځیني ژوند او خصوصي حریم کې له زیاتې مداخلې یې شکایتونه لري.