تاند: ( چار شنبه، د حوت ۱۰ ) د طالبانو د کورنيو چارو وزارت وایي، چې په کابل کې د یوناما دفتر مرستيال مارکس پوتزل د دغه وزارت له لومړي مرستیال مولوي محمد نبي عمري سره د لیدنې پر مهال د داعش ډلې او نیشه یي توکیو پر وړاندې مبارزه کې د دغه وزارت د مشرتابه هڅې ستایلي دي.
د دغه وزارت د خبرپاڼې له مخې، په دې لیدنه کې مولوي عمري ویلي چې د دوی امنيتي ځواکونه په تېره ملي پوليس د يوناما د ټولو د فتري څانګو، سفارت خونو او نورو بهرنيو بنسټونو د امنيت ټينګښت خپل لومړيتوب ګڼي او ډاډ يې ورکړ، چې ټول بهرني بنسټونه چې د طالبانوادارې سره د همکارۍ ليوالتيا لري، په سوله ييزه فضا کې کولی شي خپلو همکاريو ته دوام ورکړي.
سرچینه زیاتوي:(( د ملګرو ملتونو معاونت استازي ټينګار وکړ، چې ددوی ټولنې د حاکمې ادارې لاسته راوړنې، په ځانګړې توګه د کورنيو چارو وزارت هڅې، چې د داعشيانو ځپلو، نشه يي توکو سره. مبارزې او هم د روږدو د راټولولو او درملنې په برخه کې دي ستايلي او په راتلونکې کې هم ورته هلې ځلې ستايي.))
طالبان په داسې مهال د داعش ډلې خلاف د خپلو لاسته راوړنو خبره کوي، چې د دوی د ادارې سیمه ییز متحدین په وروستیو کې په افغانستان کې د داعش ډلې له پياوړتیا پرله پسې اندیښنې څرګندوي.
طالب چارواکو په ځلونو د داعش ډلې د نابودۍ ادعاوې کړې، خو وروسته د دې ډلې د بریدونو او فعالیتونو خبرونه ورکړل شوي.
تازه، د طالبانو ویاند ذبیح الله مجاهد ویلي، چې کابل کې د وروستیو عملیاتو پر مهال یې د داعش د خراسان څانګې د استخباراتو او عملیاتو برخې مشر قاري فاتح وژلی.