تاند: ( سې شنبه، د حوت ۹ ) د عامې روغتیا وزارت لپاره د طالبانو د رژیم د پلان او پالېسۍ مرستیال محمد حسن غیاثي وایي چې په را روان کال کې به په بدخشان ولایت کې ۴۴ نوي روغتیایي مرکزونه جوړ شي.
هغه وویل، د عامې روغتیا وزارت پلان لري چې د بدخشان په مرکز او ولسوالیو کې روغتیایي مرکزونو ته په کمي او کیفي توګه ارتقا ورکړي.
نوموړی وایي، د عامې روغتیا وزارت یو پلاوى بدخشان ته تللى و او هلته یې له خلکو سره له نږدې ليدلي او د هغوی ستونزې يې اورېدلې دي.
هغه زياتوي، د یاد پلاوي د ارزونې په پايله کې به په راتلونکي کال کې د بدخشان ولايت د روغتيايي مرکزونو شمېر له ١٥٠ څخه ٢٠٠ ته لوړ کړاى شي.
ډېر مهال د ژمي په موسم کې د واورې ورېدو له امله د بدخشان د ولسواليو لارې له مرکز سره تړلې وي او خلک يې نه شي کولاى خپل ناروغان مرکز او يا هم نورو ولايتونو ته انتقال کړي.