تاند: ( یکشنبه، د حوت ۷ ) د افغانستان د خصوصي پوهنتونونو ټولنه وايي چې د طالبانو له خوا په پوهنتونونو کې د نجونو پر زده کړو د بندېز له امله د خصوصي پوهنتونونو کابو 6000 کارمندان له دندو ګوښه شوي او نیږدې ۴۰ دغه پوهنتونونه د تړل کیدو پړاو ته نیږدې شوي دي.

د دغې ټولنې مطبوعاتي کارکوونکي عبدالکریم ناصري ویلي، چې د طالبانو له لوري پر ښځینه وو د پوهنتوني زده کړو بندیز سره تر ۷۰ زرو پورې ښځینه محصلانې له زده کړو محرومې شوي دي.

نوموړی وایي: “تر اوسه پورې د 35 نه تر 40 پورې دخصوصي پوهنتونونو او د لوړو زده کړو دموسسو تصميم دا دی چې که چېرته دغه پرېکړې بېزته وانه خستل شي او تجديد نظر ونه شي او مسايل عادي نه شي نو ممکن خپل پوهنتونونه وتړي”

ناصري زياته کړه که چېرې د خصوصي پوهنتونونو او تحصيلي بنسټونو پر وړاندې ستونزې دوام وکړي، د افغانستان شل کلنې تحصیلي لاسته راوړنې به له منځه لاړې شي.

د خصوصي پوهنتونونو د ټولنې د معلوماتو له مخې، د هېواد په 24 ولايتونو کې 140 خصوصي پوهنتونونه او د لوړوزده کړو موسسې فعاليت کوي۔

دغه ټولنه وايي په دغو تعليمي ادارو کې شاوخوا 1 لک او 30 زره هلکانو او 70 زره جينکو زده کړې تر سره کولې اؤ د دې ترڅنګ په دغو تعليمي ادارو کې د علمي کدرونو په ګډون شاوخوا شل زرو تنو ته دندې په برخه شوې وې.

 دا په داسې حال کې ده، چې پرون د طالبانو د لوړو زده کړو وزارت په کابل کې د خصوصي پوهنتونونو په اړه غونډه جوړه کړې وه او د زده کړو د پياوړتیا ژمنې یې وکړې.