تاند: ( یکشنبه، د حوت ۷ ) د پاکستان د بلوچستان ایالت په خضدار سیمه کې د پاکستان ۲ پولیس وژل شوي او ۳ نور ټپيان دي.
د راپورونو له مخې، دغه چاودنه د پاکستان د پولیسو پر یوه موټر شوې ده.
د پېښې مسوولیت کومې ډلې پر غاړه نه دی اخیستی.
په بلوچستان کې د پاکستان د پرزولو او بلوچانو د ازادۍ لپاره له څو کلونو راهیسې وسله واله مبارزه په شدت روانه ده.
هلته او د پاکستان په یو شمېر نورو سیمو کې د داسې پېښو مسوولیت د بلوڅ ازادي غوښتونکي پوځ له لوري منل کیږي.
بلوڅ ازادي غوښتونکی پوځ او نورې مبارزې ډلې پاکستان یو غیر طبیعي او د انګریزانو له لوري په زوره جوړ شوی هېواد بولي.
دا مبارزې ډلې باور لري، چې پاکستان د پنجابي استعمارګرو په ولکه کې دی او د نورو قومونو او سیمو امکانات یې قبضه کړي دي.