تاند: (جمعه، د کب ۵ مه) په پاکستان کې د اوکراین سفیر د پاکستان له حکومته غوښتي، چې په ښکاره دې پر اوکراین د روس یرغل وغندي او د اوکراین په معامله دې په نړیوالو کوښښونو کې شامل شي.
سفیر مارکیان چوچک وویل پاکستان دې دا اونۍ په ملګرو ملتونو کې د اوکراین په اړه د کيدونکو پريکړو ملاتړ هم وکړي.
هغه وویل د اوکراین په اړه اړه پریکړه ليک به د ملګرو ملتونو عمومي غونډې ته وړاندې شي او پکې به په اوکراین کې د امنيت د تامينولو، جامع او منصفانه حل غوښتنه وشي.
اسلام اباد د اوکراین د جګړې په اړه بې طرفه دریځ خپل کړی.
پاکستان تر دې مخکې د اوکراین په اړه په ملګرو ملتونو کې د امریکا له لوري له يوه وړاندې شوي پريکړه ليک سره ملتيا او مخالفت دواړه نه و کړی.
پاکستاني چارواکو د اوکراین د غوښتنې په اړه غبرګون نه دی ښودلی.