تاند: ( پنجشنبه، د حوت ۴ )  د افغانستان بانک پخوانی رئیس ډاکټر انورالحق احدي وایي، چې د افغانستان د درې نیم میلیارده ډالره کنګل شوې بانکي زېرمې په اړه د نیویارک محکمې پریکړه استیناف پړاو ته تلونکې ده.

د هغه په وینا، پر دغې پریکړې د سپټمبر د یوولسمې پېښې دعوه لرونکو قرباني کورنیو قناعت نه دی کړی او د استیناف غوښتنه یې کړې ده.

ډاکټر احدي د یادې پانګې په اړه د امریکا د محکمې پریکړه ستایلې ده.

امریکایي محکمې ویلي، چې د سپټمبر د یوولسمې قرباني کورنۍ له دغې پېښې سره د افغانستان د حاکمو طالبانو د تړاو له امله په تاوان کې د افغان پانګې د غوښتلو حق ځکه نه لري، چې دغه پانګه د طالبانو نه، د افغانانو ملکیت دی.

دغه پخواني افغان مقام ویلي، چې په ډېر ګومان د امریکا استیناف محکمه به هم ورته پریکړه کوي او د افغانستان بانکي زېرمه به له ضایع کیدو وژغورل شي.

د طالبانو تر کنټرول لاندې د افغانستان بانک چارواکو هم د امریکا د یادې محکمې د پریکړې هرکلی کړی دی.