تاند: ( پنجشنبه، د حوت ۴ ) د طالبانو د ریاست الوزراء اقتصادي او اداري کمېسیونونو د دوی د مالیې وزارت د بودیجې طرحه په یوه غونډه کې اوریدلې او ارزولې ده.
د طالبانو د مالیې وزارت په یوه اعلامیه کې راغلي، چې د طالبانو د رییس الوزرا اقتصادي مرستیال ملا برادر او اداري مرستیال ملا عبدالسلام حنفي مالیې وزارت ته ورغلي او د بودیجې په اړه یې غونډه کړې.
د مالیې وزارت په خبرپاڼه کې راغلي:(( د ملي بودیجې لوی ریاست له لوري د ۱۴۰۲ مالي کال لپاره د بوديجې ترتيب سوی سند د ټولو ارقامو سره شريک شو، د دې تر څنګ د راتلونکي کال د عوايدو سطحه، احتمالي کسر، د لګښتونو پر کنټرول او ځيني نورو مهمو موضوعاتو باندي هم بحث وشو.))
معلومه نه ده، چې ملا برادر او ملا حنفي د خپل مالیې وزارت د بودیجې په اړه څه ویلي.