تاند: ( پنجشنبه، د حوت ۴ )  د افغانستان مشهوره هنرمنده ښاپېرۍ نغمه، چې تازه یې د افغان نجونو د تړل شویو ښوونځیو د بیرته پرانیستلو لپاره سندریزه مبارزه پيل کړې، په یوه مرکه کې د افغانستان پر حکومتونو دې ته له نه پاملرنې نیوکه وکړه.

ښاپېرۍ نغمې وویل، چې د پاکستان ولسمشر د نازونې په دود یو ځل تمغه یا نښان ور ډالۍ کړ، خو افغانستان کې کوم ولسمشر ونه ستایله.

هغه زیاتوي، چې له دې سره هم نهیلې شوې نه ده او خپل هنري خدمت ته یې دوام ورکړی او لا به دوام ورکوي.

ښاپېرۍ نغمې تازه د نجونو د زده کړو لپاره یوه نوې سندره ویلې، چې شاعر یې هارون حکیمي دی.

د ښاپېرۍ نغمې تازه هنري هڅې د خلکو هرکلي سره مخ شوي او افغان فعالانو له نورو هنرمندانو هم غوښتي، چې د نجونو د زده کړو په ګډون د افغانانو د ژوند د بدلون لپاره هنري مبارزه وکړي.