تاند: ( دوشنبه، د حوت لومړۍ ) د زابل ولایتي روغتون د پښتورګو د درملنې څانګه پرانیستل شوه.
د عامې روغتیا وزارت لپاره د طالبانو مالي او اداري معین مولوي محمد اسحق صاحبزاده وویل: ( دا مرکز د ۴ ميليونه افغانيو په ارزښت جوړ شوی، د دې مرکز پرانیسته د یاد ولایت اوسېدونکو لپاره یو ستر زېری دی.)
د زابل عامې روغتيا رييس ډاکټر میرویس افغان د خوښي په څرګندولو سره وويل، زابلیان نور اړ نه دي چې د پښتورګو درملنې لپاره ليري ولاړ شي ځکه د دې مرکز په پرانیستې سره اوس په دې برخه کې ټولې اړتیاوې پوره کېږي.
د طالبانو د عامې روغتیا وزارت وايي هڅه کوي چې ټولو هېوادوالو ته معیاري روغتیايي خدمات وړاندې کړي.
دا په داسې حال کې ده، چې د طالبانو له واکمنیدو سره د نورو برخو ترڅنګ په روغتیایي برخه کې هم نړیوالو مرستندویانو خپلې مرستې کمې کړي او له دې امله خلکو ته ډېرې ستونزې رامنځته شوي دي.