تاند: ( شنبه، د دلوې ۲۹مه ) د طالبانو د کانونو او پټرولیم وزیر شېخ شهاب الدین دلاور د دې ډلې د مشرانو ترمنځ د اختلافاتو د موجودیت ادعاوې رد کړې.
هغه پرون په کابل کې د یوې مدرسې فراغت غونډې ته د وینا پر مهال په دې اړه خپاره شوي راپورونه شیطاني تبلیغات وبلل او ویې ویل، چې د طالبانو د مشرانو تر منځ هیڅ اختلاف نشته او دوی په ټولو خبرو ښه پوهیږي.
دلاور څو ورځې مخکې له افغانستان څخه د شوروي ځواکونو د وتو د کلیزې په یاد غونډه کې په کنایوي ډول پر طالب مشرانو نیوکې کړې وې.
هغه ویلي وو، چې د افغانستان رهبرانو تل د خلکو په لاس ګټل شوې ازادۍ بایللي او نور نه باید داسې بایلې ته فرصت برابر شي.
د دلاور دا څرګندونې د طالبانو منتقدینو داسې تعبیر کړې وې، چې ګواکې د طالبانو له لوري د افغانستان د ازادۍ ګټلو ادعا د طالب مشرانو د افراطي دریځونو له امله د بایلل کیدو له ګواښ سره مخ بولي.
په وروستیو کې نورو طالب مشرانو هم د دې ډلې د واکمنۍ پر افراطي پریکړو ښکاره او پټې نیوکې کړي، چې ورسره د طالبانو ترمنځ د اختلافاتو د شدت خبرونه ورکړل شوي.
د طالبانو ویاندویانو هم د دوی ترمنځ د اختلافاتو د موجودیت خبرې بې بنسټه ګڼلي دي.