تاند:( سی شنبه، د دلوې پينځه ويشتمه) د افغانستان لپاره د روسیې د ولسمشر ځانګړي استازي ضمیر کابلوف په یوه تازه مرکه کې د طالبانو پر حکومتولۍ توندې نيوکې کړي دي.
نوموړي ويلي:« په دې ځانګړي وخت کې، موږ د افغانستان د ټولنیز-اقتصادي وضعیت په اړه اندیښمن یو، د نورو ننګونو تر څنګ تروریزم او مخدره توکي سره يو ځای شوي او وضعيت ېې د اندیښنې وړ ګرځولی دی.»
د هغه په وينا، طالبانو “د امريکايانو او ټولو ګوډاګيو حکومتونو په شړلو” ښه کار وکړ، خو “د حکومت چلولو څرنګوالی يې نه دی زده کړی.”
کابلوف زیاتول:”طالبانو څو څو ځله دا خبره تکرار کړې، چې درسونه يې زده کړي او پخوانۍ تېروتنې به نه تکراروي. خو اوس موږ بيا د دوی د تېروتنو تکرار وينو، چې د افسوس خبره ده.»
کابلوف وویل: “طالبان کله ناکله په ساده شیانو نه پوهیږي، په ځانګړې توګه کله چې د دوی ځواک ته ننګونې نه وي موجودې. زما مطلب جدي ننګونکي دي چې کولی شي دوی مینځه یوسي. دا ننګونې به د بهر څخه څوک نه راوړي. دا به د افغانانو یو عادي عکس العمل وي ځکه چې د دوی لپاره به په داسې شرایطو کې ژوندي پاتې کیدل خورا ستونزمن وي.»
د افغانستان لپاره د روسیې د ولسمشر ځانګړي استازي وویل، موږ تر خپله وسه هڅه کوو چې له افغانستان سره د سوداګرۍ په پراختیا او د بشري مرستو په لېږلو سره پر افغانانو فشار کم کړو او دې کار ته به دوام ورکړو. خو طالبان باید د وضعیت د ښه کولو لپاره بنسټیز ګامونه پورته کړي یا لږ تر لږه د داسې پرمختګ لپاره لاره پرانیزي، چې موږ یې دا مهال نه وینو.»
د دې پوښتنې په ځواب کې چې ایا طالبان تر اوسه د خبرو له مختلفو بڼو سره سره د خپل چلند په بدلولو کې پاتې راغلي، کابلوف وویل چې دیپلوماسۍ او د قانع کولو یوه لاره شته.
طالبانو د روسیې د ځانګړي استازي څرګندونو ته غبرګون نه دی ښودلی.