تاند:( سی شنبه، د دلوې پينځه ويشتمه) د ننګرهار لپاره د طالبانو د ادارې چارواکو د ماشومانو په پمپرونو کې د ډالرو د کيدونکي قاچاق د مخنیوي خبر ورکړی.
د ننګرهار لپاره د طالبانو د والي د مطبوعاتي دفتر په یوه اعلامیه کې ویلي:« تورخم ښارګوټي کې مسئولينو د لس زره امريکايي ډالرو، چې په ډير مهارت سره د ماشومانو په پمپرونو کې ځای پرځای شوي و د قاچاق مخنيوی وکړ.»
طالبانو د دغه قاچاق د عاملینو په اړه څه نه دي ويلي.
څه موده مخکې د طالبانو د رييس الوزرا په يوه حکم کې له افغانستانه د ډالرو او نورو اسعارو قاچاق کوونکو ته د سختې سزا خبرداری ورکړل شوی و.