تاند:( چار شنبه، د دلوې نولسمه) د کابل امنیې قومندانۍ طالب ویاند خالد ځدراڼ هغه اوازې رد کړي، چې ګواکې د کابل له نړيوال هوایي ډګر څخه ترکیې ته خلک لېږدول کېږي.
خالد ځدراڼ دغه اوازې په بشپړه توګه دروغ بولي او وايي چې هېڅ حقیقت نهلري.
نوموړی زیاتوي:«ساعت وړاندې ځینو کسانو هوایې ډګر ته مراجعه کړې وه چې د امنیتي موظفینو لخوا بېرته رخصت شول.»
په ورته وخت کې، له خلکو سره د طالبانو د امنیتي ځواکونو د تاوتريخوالي خبرونه ورکړل شوي.
نن په ټولنیزو رسنیو کې داسې اوازې خپرې شوې، چې ګواکې ترکيې هېواد له کابل هوايي ډګر څخه هغه کسان خپلې خاورې ته لېږدوي، چې د ترکېې په زلزله ځپليو سيمو کې غواړي کار وکړي.
د طالبانو له بيا واکمنيدو وروسته، ډېری افغانان د اقتصادي او بشري ناورين، وضع شويو قيوداتو او ژورې نهيلۍ له امله د هېواد پريښودو په هڅه کې دي.