تاند:( دوشنبه، د دلوې اوولسمه) د کونړ د طبيعي پېښو پر وړاندې د مبارزې ریاست مسوولين وايي، چې د دغه ولایت په چپې درې ولسوالۍ کې پر یوه کور د لويې تیږي رالوېدو له امله ٧ کسانو ته مرګ ژوبله اوښتې ده.
د دغه ولايت د طبيعي پېښو پر وړاندې د مبارزې ریاست مسوولينو وویل، چې د چپې درې ولسوالۍ په بستلي کلي کې په یوه کور لویه تیږه رالوېدلې، چې په کې یو ماشوم مړ شوی او ٦ کسان ټپیان شوي دي.
مسوولينو په ټپیانو کې د ٣ کسانو روغتيايي وضعیت د اندېښنې وړ بللی دی.
کونړ د هېواد له غره ييزو ولايتونو څخه دی، چې هواره ځمکه پکې کمه ده او ډېر کورونه یې د غرونو لمنو کې جوړ شوي.