تاند:( دوشنبه، د دلوې اوولسمه)‏ د طالبانو د حاکمې‏ ادارې د بهرنيو چارو وزارت له نړیوالو مرستندویانو او اسلامي هېوادونو غوښتي، چې د ترکېې زلزله ځپلو سره بیړنۍ مرستې وکړي.

دغه وزارت په یوه اعلامیه کې د ترکېې خلکو او حکومت سره پر يادې پېښې خواخوږي ښودلې.

د افغانستان پخواني ولسمشر حامد کرزي، د پخواني نظام د مصالحې عالي شورا رييس ډاکټر عبدالله او يو شمېر نورو افغان سیاستوالو هم د پېښې په اړه غمرازي ښودلې ده.

بلخوا راپورونه وايي، چې د ترکیې په سویل او شمالي سوریه کې د شوې دغې لویې زلزلې له امله، چې تر زرو زیات کسان پکې وژل شوي د ژغورنې عملیات روان دي.

د 7.8 درجې زلزله د دوشنبې په سهار وختي د غازیانټیپ سره نږدې په داسې حال کې وشوه چې خلک په خوب کې وو.

د ریختر په کچه د ۷.۵ درجې یوه نوې زلزله په ځایی وخت شاوخوا ۱۳:۳۰ (۱۰:۳۰ GMT) وشوه، چې د چارواکو په وینا “د زلزلې نه وروسته” وه.

د ترکیې ولسمشر رجب طیب اردوغان ویلي دي چې د لومړۍ زلزلې نه وروسته یواځې په ترکیه کې ۹۱۲ تنه وژل شوي او تر ۵۳۰۰ ډیر ټپیان شوي دي.

د سوریې چارواکي د ۳۷۰ تنو د وژل کیدو خبر ورکوي.

ژغورونکي په دواړو هیوادونو کې د سلګونو ودانیو د نړیدو وروسته د خاورو لاندې د خلکو د ژغورلو لپاره هڅې کوي.

د نړۍ مشرانو ژمنه وکړه چې د مرستې لپاره به د ترکیې سره مرسته کوي.

ویل کیږي، چې د يادې زلزلې ټکانونه پر ترکیې سربېره په سوریه، لبنان، قبرس او اسراییلو کې میلیونونو خلکو احساس کړي دي.