چهارشنبه, مارچ 22, 2023
Homeخبرونهپښتون ژغورنې غورځنګ ژر خپله نوې کاري تګلاره اعلانوي

پښتون ژغورنې غورځنګ ژر خپله نوې کاري تګلاره اعلانوي

تاند:( پنجشنبه، د دلوې دیارلسمه)‏ ‏د پښتون ژغورنې غورځنګ رهبر منظور پښتین وايي، چې د پښتنو د ننګونو او ګواښونو له شدت سره دغه غورځنګ د مبارزې يوه نوې تګلاره جوړه کړې، چې ژر به یې اعلان کړي.

ښاغلي پښتين په تازه ټلویزیوني مرکه کې د دغې تګلارې زيات جزيات روښانه نه کړل، خو وېې ويل په دې تګلاره کې د پښتنو د ژغورنې لپاره د هڅو د پراختيا لارې چارې په پام کې نيول شوي.

ګومان کېږي، چې دغه تګلاره به د پښتنو د ژغورنې لپاره د مختلفو ملتپالو سیاسي ډلو د انسجام اړوند وي.

ښاغلی پښتين په وروستيو کې بیا – بیا ټینګار کوي، چې پښتانه کمزوري نه دي؛ بلکی وېشل شوي او خپلې بې اتفاقۍ بې وسه کړي دي.

تمه کيږي، چې د پېښور پر پولیسو له وروستي مرموز خونړي برید وروسته پښتون ژغورنې غورځنګ د مختلفو پښتنو ادرسونو په ګډ ایتلاف جوړولو بریالی او خپله مبارزه پراخه او نوره هم اغېزمنه کړي.

تېره اونۍ په اسلام اباد کې د باچا خان او ولي خان د کنفرانس پر مهال د نيشنل عوامي ګوند د يوه مشر احمد بلور او د جمعيت علمای اسلام ګوند د مشر مولانا فضل الرحمن د روغبړ يو پښتني عکس، چې منظور پښتین هم پکې خوشاله ولاړ و، د ټولنیزو رسنیو د ډېرو فعالانو پاملرنه خپله کړې وه.

فعالانو هیله ښودلې وه، چې کاشکې پښتانه ملايان، نور ريښتيا هم پښتانه او د پنجاب پر ځای خپلو پښتنو مبارزينو سره د پښتنو د دفاع لپاره ودريږي.

LEAVE A REPLY

Please enter your comment!
Please enter your name here

- Advertisment -

ادب