تاند:( پنجشنبه، د دلوې دیارلسمه) د پاکستان په پارلمان کې د جنوبي وزيرستان استازی او د ملي جمهوري غورځنګ ګوند مشر محسن داوړ وايي، پښتانه که د نړۍ په هر ځای کې وي، افغانستان يې لوی کور او د دغه کور دفاع ورباندې فرض ده.
نوموړي په یوه نوې ټلويزوني مرکه کې ټينګار وکړ، چې د سياسي وېشنو باوجود پر لوی افغانستان او لرو بر يو افغان شعارونو باور لري او د افغانستان دفاع پر ځان فرض بولي.
نوموړي په افغانستان کې د یوه خپلواک او ديموکراتيک نظام رامنځته کيدل اړين وبلل او په دې برخه کې يې پاکستان ته د لوی خنډ په توګه د ملامتۍ ګوته ونيوله.
محسن داوړ زياته کړه، چې له بې واکه شوي افغان ولسمشر محمد اشرف غني سره وروستۍ ليدنه کې ښاغلي غني د سيمې د امنيت لپاره ګټور نظرونه لرل او ده ته د نوموړي طرحې او ليدلوری په دې اړه ګټور او په زړه پورې بریښي.