تاند:( سې شنبه، د دلوې يوولسمه) د افغان نجونو پر زده کړو د طالبانو د حاکمې ادارې د بندیزونو پر وړاندې د اعتراضونو په دوام، دا ځل د ایران د بهرنیو چارو وزیر حسین امیر عبداللهیان دغه بندیزونه د اسلامي اصولو خلاف ګڼلي.
حسین امیر عبداللهیان له خپل قطري سیال شیخ محمد بن عبدالرحمن آل ثاني سره د لیدنې پر مهال ويلي:« موږ چمتو يوو، چې د افغانستان د سرپرست حکومت په همغږۍ، افغان نجونو ته د زده کړو امکانات برابر کړو.»
د طالبانو ادارې د ایران د بهرنیو چارو وزیر نیوکې او د همکارۍ وړانديز ته غبرګون نه دی ښودلی.
مخکې د ترکېې ولسمشر رجب طیب اردوغان او د ډیرو نورو اسلامي او غیر اسلامي هېوادونو مشرانو د طالبانو له ادارې غوښتي وو، چې د نجونو د زده کړو او ښځو د کار پر وړاندې بنديزونه بیرته واخلي.
طالبانو په تازه ګامونو کې، خصوصي پوهنتونونو ته امر کړی چې د کانکور په راتلونکې ازموینه کې د نجونو نوم ليکنه ونه کړي او دغه راز يې، په کندهار کې د روغتيايي او تعليمي ادارو ښځينه کارکوونکو ته ويلي، چې له محرم پرته دې دندو نه حاضريږي.
د طالبانو دا ډول افراطي پریکړې سبب شوي، چې يوه د پام وړ برخه غير طالب پلويان يې له دوی څخه په خپل ملاتړ پښيمانه شي او دوی نه اصلاح کيدونکي وبولي.