تاند:( دوشنبه، د دلوې لسمه) په پېښور کې د ننني ځانمرګي برید مسوولیت د پاکستان د طالبانو تحریک ټي ټي پي پر غاړه واخيست.
دغې ډلې ویلي، چې د ياد شوي برید په ترسره کولو ېې د پاکستان حکومت څخه د خپل وژل شوي مشر عمر خالد خراساني غچ واخیست.
د یادې ډلې په وينا، د خراساني د غچ اخيستو لړۍ به دوام ولري.
د پېښور ښار د پولیسو د ځانګړې مېنې په جومات کې نن ماسپښین په چاودنه کې لږترلږه ۱۵۰ تنه ټپیان شوي او لږترلږه ۳۲ وژل شوي وي.
د دغې پېښې په غبرګون کې د پښتون ژغورنې غورځنګ رهبر منظور پښتین ويلي:« نن یو ځل بیا د پښتنو وینې توېې کړل شوې.د دې ډالري جنګونو خلاف د قامي اتحاد نه پرته هیڅ بله لار نشته.زمونږ هڅې به جاري وي چې یو اتحاد قایم شي.»
د پاکستان پوځ او استخبارات د نورو پښتنو ملتپالو له لوري په دې تورن دي، چې د نړيوالو استخباراتي لوبو لپاره ېې د پښتنو سيمو ته جګړې او افراطیت راوړی او پښتانه په مختلفو نومونو له منځه وړي او سېمې ېې نا امنه ساتي.