تاند:( دوشنبه، د دلوې لسمه)‏ په پاکستان کې د طالبانو تر کنټرول لاندې د افغانستان سفارت په پېښور کې د پولیسو پر یوه جومات نننۍ چاودنه وغندله.

یاد شوي سفارت په يوه اعلاميه کې ويلي، چې پر لمونځ کوونکو او جومات برید د اسلام خلاف عمل دی.

په پېښور کې د ننني ځانمرګي برید مسوولیت د پاکستان د طالبانو تحریک ټي ټي پي پر غاړه اخیستی.

دغې ډلې ویلي، چې د ياد شوي برید په ترسره کولو ېې د پاکستان حکومت څخه د خپل وژل شوي مشر عمر خالد خراساني غچ واخیست.

د یادې ډلې په وينا، د خراساني د غچ اخيستو لړۍ به دوام ولري.

 د پېښور ښار د پولیسو د ځانګړې مېنې په جومات کې نن ماسپښین په چاودنه کې لږترلږه ۱۵۰ تنه ټپیان شوي او لږترلږه ۳۲ وژل شوي وي.

په افغانستان کې حاکمو طالبانو ياد شوی برید په داسې حال کې غندلی، چې خپله دوی هم د تیرې شل کلنې جګړې پر مهال د جمهوري نظام پر ځواکونو په جوماتونو کې د لمانځه پر مهال په بريدونو تورن وو.

پاکستاني چارواکي د افغانستان حاکمه اداره پاکستاني طالبانو ته په پناه ورکولو هم تورنوي، خو د طالبانو ادارې دغه تورونه رد کړي دي.