تاند:( شنبه، د دلوې اتمه) د ملګرو ملتونو د نړیوال سازمان د سرمنشي مرستیالې امینې محمد پر افغان ښځو او نجونو د لګول شويو طالبي بنديزونو کميدو ته هيله مندي ښودلې ده.
نوموړې له سي.اېن.اېن. ټلوېزیون سره په مرکه کې ویلي، د طالبانو د خپلمنځي اختلافاتو او د ټولو خواوو فشارونو ته په کتو داسې احساسوي،چې پر افغان ښځو او نجونو د یو څه بندیزونو لېرې کېدل ممکن دي.
هغې په دې اړه نور جزییات نه دي ورکړي.
آمنه محمد څه موده مخکې د ملګرو ملتونو د يوه لوړپوړي پلاوي په مشرۍ افغانستان ته راغلی و او په کابل او کندهار کې يې د طالبانو يو شمېر چارواکو سره وليدل.
طالبانو د نوموړې د دغې هیله مندۍ په اړه څه نه دي ويلي.
د طالبانو ډلې پر افغانستان له بيا واکمنيدو وروسته، په تدريجي ډول د ښوونځي له شپږم ټولګي څخه پورته د نجونو پر مخ د ښوونځيو او پوهنتونونو دروازې تړلي او هم ېې په دولتي او نا دولتي ادارو او ډېرو نورو برخو کې د ښځو د کار او فعاليت مخه نیولې ده.