تاند:( دوشنبه، د دلوې درېیمه) د طالبانو د رژيم د سترې محکمې وياند مولوي عنایت الله وايي، چې دغې محکمه په خپل اوسني تشکیل کې پینځه معاونیتونه لري، چې يو ېې د کندهار زون د قضايي چارو معاونیت دی.
نوموړي د طالبانو تر کنټرول لاندې د افغانستان ملي ټلويزيون ته په يوه ځانګړې مرکه کې د کندهار زون لپاره د ځانګړي معاونیت د رامنځته کیدو دليل نه دی روښانه کړی.
هغه په عین حال کې ويلي، چې د طالبانو له واکمنيدو سره په محکمو کې فساد ورک شوی او د خلکو کارونه له ځنډ پرته مخته وړل کیږي.
د طالبانو دغه وياند ادعا وکړه، چې تر دې دمه هیچا د محکمې له کارونو شکایت نه دی کړی او دوی په ټول هېواد، ان نويو تشکیل شویو ولسواليو کې هم د خپلو فعاليتونو په پيلولو توانیدلي دي.
دا په داسې حال کې ده، چې د حقوقي چارو څارونکي د طالبانو پر محکمو نیوکې لري او وايي په څو لسيزو کې د افغانستان روزل شوي او تجربه کار ظرفیتونه ترې شړل شوي او دندې ېې ټولې ملایانو ته سپارل شوي.