تاند:( یکشنبه، د جدي ۲۵) په بادغیس کې د طالبانو سيمه ييزو چارواکو تاييد کړه ، چې ۵ تنه د سړې هوا له امله مړه شوي دي.
د بادغیس لپاره د طالبانو د والي ویاند احمد حنظله وايي، چې د دغه ولایت په قادس ولسوالۍ کې په تېرو څو ورځو کې د سړې هوا له امله یو شپونکی او ۴ ماشومان مړه شوي دي.
نوموړي په دې اړه نور جزییات نه دي ورکړي.
په وروستيو کې د افغانستان بېلابېل ولايتونه د بیسارې سړې هوا شاهدان دي.
د سختې يخنۍ له امله په يو شمېر نورو ولايتونو کې هم د خلکو د مړينې او سختو ناروغيو خبرونه ورکړل شوي.
له دې سره، د طالبانو چارواکو په یو شمېر لویو لارو کې د لسګونو په واورو کې ايسارو کسانو د ژغورلو خبر ورکړی.