تاند:( شنبه، د جدي ۲۴) د طالبانو د فواید عامې وزارت چارواکو د سالنګ لارې د بیرته پرانیستلو خبر ورکړی.
دغه وزارت په یوه اعلامیه کې ویلي، چې ياده لاره یې د سالنګونو د ساتنې رياست د کارکوونکو په هڅو له واورو پاکه او بیرته پرانیستل شوې ده.
وزارت له ټولو موټر چلوونکو غوښتي، چې په سالنګونو کې په ځانګړي ډول ترافیکي قوانینو او د مسوولينو لارښوونو ته پاملرنه وکړي.
د افغانستان ډېرې سړې سیمې او له هغې ډلې سالنګونه په وروستيو ورځو کې تر سختو واورو او ورښتونو لاندې دي.
د دغو ورښتونو او لار بندیدو له امله سالنګ کې لسګونه تنه ايسار شوي هم وو، چې د طالبانو د دفاعي ځواکونو له لوري ژغورل شوي.