تاند:( يکشنبه، د جدي ۱۸) د افغانستان بانک سرچينو کابل ته د نړیوالو بشري مرستو بنديدل رد کړل.
د بانک په یوه اعلامیه کې راغلي چې د دغو مرستو د بندېدو راپورونه ناسم او بې بنسټه دي.
افغانستان بانک د رسنيو له مسوولينو غوښتي، چې په اطلاع رسولو کې واقعیتونه په نظر کې ونيسي.
افغانستان بانک په تازه اعلامیه کې بيا تایید کړې، چې د تېرې لیندۍ میاشتې له ۲۳ مې وروسته کابل ته د اونیزو بشري مرستو نقدي کڅوړې نه دي راغلي.
ځينو رسنيو پرون د افغانستان بانک د ویاند حسیب نوري له قوله خبر ورکړ، چې نړيوالو د نجونو او ښځو پر زده کړو او کار د طالبانو د وروستیو بندیزونو په غبرګون کې افغانستان ته د بشري مرستو استول ځنډولي.
د ښځو او نجونو د زده کړو او کار پر ضد د طالبانو بندیزونه په پراخه کچه د نړیوالو مخالفت سره مخ شوی او خبرداری ورکړل شوی، چې د دغو بندیزونو له نه لغوه کیدو سره به افغانستان سره کيدونکې بشري مرستې ودرول شي.
د طالبانو ځينو چارواکو او له هغې ډلې د دوی د لوړو زده کړو سخت دریځه وزیر ملا ندا محمد ندیم د ښځو زده کړې او کار د دوی « بې عزتي» او « د کفارو غوښتنه» ګڼلې او ورسره د مخالفت په دوام ېې ټینګار کړی.