تاند:( شنبه، د جدي ۱۷) د پاکستان د بهرنيو چارو او د طالبانو د ادارې دفاع وزارت د افغانستان پر خاورې د پاکستان د هوايي بريدونو راپورونه رد کړي.
دغو وزارتونو په جلا جلا اعلامیو کې په دې اړه خپاره شوي راپورونه بې بنسټه ګڼلي دي.
له تېرې ورځې راهيسې د ځينو رسنيو له لوري د ننګرهار پر ګوشتې ولسوالۍ د پاکستان د هوايي بريدونو خبرونه ورکړل شوي.
ځايي او خپلواکو سرچينو سره په دې اړه په خبرو نه يو توانېدلي.
پاکستان څو ورځې وړاندې خبرداری ورکړ، چې په افغانستان کې د پاکستاني طالبانو تحريک د غړو د ادعا شوي حضور خلاف به عملیات وکړي.
د طالبانو حاکمې ادارې ياده ادعا رد کړې او دفاع وزارت يې ويلي، چې افغانستان بې څښتنه نه دی، چې څوک بريد ورباندې وکړي.