تاند:( پنجشنبه، د جدي پینځلسمه) د کندهار د کرنې رياست يو مقام مولوي شمس الرحمن موسی وايي، چې د دغه ولايت د انارو حاصلات تېر کال د نورو کلونو په پرتله ۲۰ سلنه کم شوي وو.
نوموړی ځینې کرنيز مرضونه او د ورښتونو کمښت د حاصلاتو د دغه کمیدو اصلي لاملونه بولي.
د کندهار د سوداګرۍ خونې مرستيال انجنير عبدالباقي بينا وايي، چې له دې سره هم کندهار د ۴۸ ميليونه ډالرو په ارزښت بهرنيو هېوادونو ته انار صادر کړي دي.
نوموړی وايي د انارو ډېره برخه پاکستان او هند او یوه برخه يې روسیې او متحده عربي اماراتو ته صادر شوي دي.
د کندهار کروندګر غوښتنه کوي، چې د حاصلاتو د ښه کیدو او زیاتیدو لپاره دې مرستې ورسره وشي.