تاند (سې شنبه، د جدي ۱۳ مه) په سعودي عربستان کې د بولیټ ریلګاډي ۳۲ ښځینه چلوونکیو له روزل کېدو وروسته د نوي میلادي کال په لومړۍ ورځ کار پیل کړ.
بولیټ ریلګاډی په ساعت کې ۴۵۳ کیلومتره مزل کوي.
د سعودي عربستان د ریللارو ادارې دا د خپل هیواد د پرمختګ لور ته یوه مهمه بریا بللې او ویلي یې دي چې دا د ښځینه ریلګاډي چلوونکو ښځو لومړۍ جوپه ده چې په ۲۰۲۲ کې یې تریننګ یا روزنه بشپړه شوې ده.
دې ادارې د نوي کال په لومړۍ ورځ د روزل شویو ښځینه ریلګاډي چلوونکیو ښځو ویدیو هم خپره کړې ده.
32 قائدة سعودية ينطلقن بأقصى سرعة لتحقيق حلمهن الكبير في قيادة أحد أسرع قطارات العالم ليكنّ بذلك أولى دفعات #قائدات_قطار_الحرمين_السريع . pic.twitter.com/zWGA5DbsuT
— الخطوط الحديدية السعودية | SAR (@SARSaudiRailway) January 1, 2023
دوی به د سعودي د مکې او مدینې ترمنځ بولیټ ریلګاډی چلوي.
د العربیه د انګلیسي ویبپاڼې د راپور پر اساس، سعودي ښځو په وروستیو کلونوکې د دغه هیواد په اقتصادي وده کې د پام وړ ونډه لرلې او اوس د خپل هیواد په بیلابیلو سیکتورونو کې رول په غاړه لري.
د سعودي په ۲۰۱۸ کال ښځو ته د موټر چلولو اجازه ورکړه او د مترقي ولیعهد د اصلاحاتو په نتیجه کې ښځو ته د ټولنیز ژوند په بیلابیلو برخو کې نور فرصتونه هم برابر شول.
د سعودي حکومت غواړي چې تر ۲۰۳۰ پورې په تېلو اتکا پای ته ورسوي.