تاند(دوشنبه، د جدي ۱۲ مه) داعش تروریستي ډلې د کابل د هوايي ډګر د پرونۍ حملې مسوولیت په غاړه واخیست.
د وروستیو راپورونو له مخې، د کابل د هوايي ډګر د پوځي برخې په لومړي قراول کې په پرونۍ چاودنه کې ۱۴ تنه وژل شوي او ۱۸ نور ژوبل شوي دي.
د رویټرز خبري اژانس د راپور له مخې، داعش ډلې نن (دوشنبه) په ټیلګرام کې ادعا کړې چې په پروني برید کې یې ۲۰ تنه وژلي او ۳۰ نور ژوبل کړي دي.
پرون د دې چاودنې په نتیجه کې د وژل شویو کسانو شمېر ۱۰ تنه ښوول شوی و خو نن طالب سرچینو د ۱۴ تنو وژل کېدا او د ۱۸ نورو ژوبلېدا تایید کړه.
تر دې وړاندې په کابل کې د چینایانو د هستوګنې پر هوټل د حملې مسوولیت هم داعش په غاړه اخیستی و.
که څه هم دا ترهګره ډله په افغانستان کې کومه سیمه تر کنترول لاندې نه لري خو د اکثره بمي او انتحاري بریدونو مسوولیت په غاړه اخلي.