تاند:( دوشنبه، د جدي دولسمه) په لغمان ولایت کې د څلورو ترافیکي پېښو له امله ۲۱ تنه ټپیان او ۳ تنه مړه شول.
د دغه ولایت د ترافیکو لپاره د طالبانو مدیر مولوي حبیب الله مبارز وویل:«د لغمان په څلورو سیمو کې ترافیکي پېښې رامنځته شوي، له امله یې ۲۴ تنو ته مرګ ژوبله اوښتې.»
هغه وایي لومړۍ پېښه د یکشنبې مازیګر ناوخته دولت شاه ولسوالۍ کې د صرف موټر د چپه کېدو له امله رامنځته شوې، چې ۱۴ تنه پکې ټپیان او یو تن مړ شوی دی.
د هغه په وينا د پېښې ۵ تنه ټپیانې ښځې دي.
دويمه او درېیمه پېښه بیا پرون مازیګر مهال د کابل-جلال اباد پر لویه لار د شهرا چینایانو بېس او کفترخانو سیمو کې د موټرو د ټکر له امله رامنځته شوې، ۵ تنه پکې ټپیان، دوه تنه مړه دي او څلورمه پېښه بیا د مرکز اړوند پهلوان بابا سیمه کې د ریکشا او سراچې د ټکر له امله رامنځته شوې چې دوه تنه پکې ټپیان شوي دي.
د طالبانو دغه مقام وایي: ټپیان پروخت د مهترلام ولایتي روغتون ته لیږدول شوي او تر درملنې لاندې دي.
په وروستيو کې د هېواد له مختلفو سيمو څخه د ترافیکي پېښو خبرونه زیات شوي، چې اصلي دليل يې د موټر او نورو نقليه وسايطو د چلوونکو بې احتياطي ګڼل کېږي.