تاند (پنجشنبه، د جدي ۸ مه) د افغانستان د احصاییې ادارې اعلان وکړ چې د الیکترونیکي تذکرو د وېش بهیر په موفتي ډول ځنډول شوی دی.
دې ادارې د الیکترونیکي تذکرو د وېش د درولو دلیل تخنیکي ستونزې بللي او په عین حال کې یې ویلي چې دا ځنډ به تر یوې اوونۍ ډېر دوام ونه کړي.
د طالبانو له واک ته رسیدو وروسته د الیکترونیکي تذکرو او پاسپورت د توزیع بهیر څو ځلې ځنډول شوی دی.
په همدې حال کې ویل شوي چې د افغانستان د الیکترونیکي تذکرو ویبپاڼه هم له تخنیکي ستونزو سره مخامخ شوې ده.
سره له دې چې په ځلونو د طالبانو د واکمنۍ په مهال د الیکترونیکي تذکرو وېش ځنډېدلی، کله چې توزیع کېدې هم، د جمهوري حکومت په پرتله لږ شمېر وېشل کېدې.
د طالبانو د حکومت په وینا، په تېرو ۱۷ میاشتو کې، چې دوی واک ته رسیدلي، څه باندې ۲ میلیونه تذکرې وېشل شوي دي.