تاند(سې شنبه، د قوس ۲۹ مه) د پاکستان پوځ ته نژدې ورځپاڼه ایکسپریس تریبیون ادعا کوي چې د لشکراسلام ډلې مرستیال طیب، چې په اجنبي مشهور دی، په سپین بولدک کې نیول شوی دی.
د دې ورځپاڼې د راپور له مخې، افغان طالبانو د لشکراسلام ډلې مرستیال، چې د پاکستان له پوځ سره جنګېږي، د دوشنبې په ورځ د کندهار په سپین بولدک ولسوالي کې ونیوه.
د طالبانو حکومت په دې اړه رسماً څه نه دي ویلي.
ورځپاڼې همداراز ادعا کړې چې په کندهار کې افغان طالب چارواکو د اجنبي د پېژندلو لپاره له پاکستاني چارواکو سره خبرې کړي دي.
ځلاخان اپرېدی د لشکر اسلام مشر دی. ځلاخان له منګل باغه وروسته د لشکر اسلام مشر شو.
دا ډله، چې په پخوانۍ خیبر ایجنسۍ کې، چې اوس د خیبر پښتونخوا برخه ده، فعالیت کوي او په پاکستان کې تروریستي ډله اعلان شوې ده.
له دې سره هممهاله له چمن څخه د دیني عالمانو او قومي مشرانو یو پلاوی کندهار ته راغلی چې د افغان طالبانو د حکومت له مشرانو سره پر دیورند کرښه د شخړو د هواري په اړه خبرې وکړي.
پاکستاني رسنیو نن د یوه ځايي چارواکي په قول ویلي چې په دې پلاوي کې، چې قاري اسلام عالمیار یې مشري کوي، د چمن د سیمې ۱۶ تنه ملایان او سپین ږیري شامل دي.
د راپور له مخې، پلاوی به د طالبانو د حکومت د کندهار له والي حاجي محمد وفا او نورو طالب مشرانو سره د کرښې په دواړو خواوو کې د نښتو په اړه خبرې وکړي.
تېره اوونۍ د سپین بولدک – چمن ترمنځ په شیرواوبو سیمه کې د دواړو خواوو ترمنځ دوې نښتې وشوې چې په دواړو خواوو کې یې لسګونو کسانو ته مرګ ژوبله واړوله.