تاند:( یکشنبه، د قوس اووه ويشتمه) د کونړ په نورګل ولسوالۍ کې د زلزله ځپلو کورنيو لپاره د ښارګوټي جوړولو چارې پيل شوې.
ځايي طالب چارواکي وايي، چې د پېښو پر وړاندې د مبارزې او چمتووالي ادارې تر څارنې لاندې د ډنمارک د کډوالو نړیوالې شورا په مالي ملاتړ د ۸۰ کورنیو لپاره، هرې کورنۍ ته په څلور بسوې ځمکه کې د درېیو خونو لرونکو کورونو جوړېدو چارې پیل شوې.
ټاکل شوې ده، چې ياده موسسه د هر کور په جوړولو ۲۰۵زره افغانۍ مصرف کړي.
د پېښو پر وړاندې د مبارزې ادارې استازي وويل چې د دغه جوړېدونکي ښارګوټي لپاره د پاکو اوبو، ښوونځي او نورو استانتیاوو برابرلو لپاره د نورو مرستندیه موسسو سره په اړیکه کې دي او هغوی ورته د همکاريو ډاډ ورکړی دی.
نوموړي همدارنګه وویل چې یاده موسسه په پام کې لري، چې د دغو کورنیو سره د ژمنیو توکو رانیولو لپاره هرې کورنۍ ته ۱۷۵۰۰ افغانۍ نغدي مرسته هم وکړي.