تاند(شنبه، د قوس ۲۶ مه) ایران په افغانستان کې د خپل سفیر د ماموریت دوره پای ته ورسوله.
په کابل کې د ایران سفارت پر خپله ټویټرپاڼه کښلي، د بهادر امینیان د کار دوره پای ته رسېدلې او دا مسله له هغه صوتي فایل سره تړاو نه لري چې په وروستیو ورځو کې افشا شو.
د ایران حکومت تراوسه پورې نه دي ویلي چې د امینیان پر ځای څوک د سفیر په توګه افغانستان ته لېږي.
که څه هم په کابل کې د ایران سفارت ویلي چې د امینیان د ماموریت دوره بشپړه شوې خو نوموړی وروسته له دې له سفارته لېرې کېږي چې د بلاک ریورارډ په نوم یوې هکرې ډلې، چې د فارس خبري اژانس یې هک کړی و، ده ته د منسوبو خبرو ادیو یا صوتي فایل افشا کړ.
د فارس خبري اژانس په دې افشا شوي فایل کې امینیان طالبان د افغانستان او نړۍ لپاره یو ناورین او مصیبت بولي او په عین حال کې وايي چې ایران له دې پرته چې له دې فرصته په استفادې هغوی د مغولانو په شان متمدنه کړي، بله چاره نه لري.
خو په کابل کې د ایران سفارت ویلي چې د ځینو دښمنو رسنیو د ادعا خلاف د ډاکتر امینیان د ماموریت پای ته رسیدا د افغانستان په اړه ده ته له منسوبو وروستیو خپرو شویو څرګندونو سره هیڅ ارتباط نه لري او له دیپلوماتیک دود سره سم، د هغه ماموریت د کار د درېیم کال له بشپړېدو سره پای ته رسیدلی او ښاغلي کاطمي قُمي ته د ایران د سفارت چارې سپارل شوي دي.
حسن کاظمي قمي د افغانستان لپاره د ایران ځانګړی استازی دی.