تاند:( جمعه، د قوس پینځه ويشتمه)‏ د محمود خان اڅکزي په مشرۍ د پښتونخوا ملي عوامي ګوند نن د پاکستان په پارلمان کې د جنوبي وزيرستان د استازي او ملتپال مبارز علي وزير د خوشې کولو لپاره لاریونونه کوي.

 محمود خان اڅکزي د‌ دسمبر په دویمه خبرداری ورکړی و ،چې که علي وزير ژر خوشې نه کړل شي، دوی به یې د خوشې کیدو لپاره پراخ لاریونونه پيل کړي.

ښاغلي اڅکزي ویلي وو:« په کراچۍ کې د ترهګرۍ ضد عدالت د 440 کسانو په وژنو کې تورن راو انوار ته ضمانت ورکړی، خو علي وزیر ته ضمانت نه ورکوي.»

د ياد ګوند د بلوچستان ایالت مشر قهار ودان وايي، علي وزیر د پارلمان غړی دی هيڅ جرم یې نه دی کړی، جمهوريت او په پاکستان کې يې د قانون حاکميت غوښتی خو هغه بندي دی.

علي وزير په پښتنو سيمو کې د پاکستان د پوځ او استخباراتو د مرموزو پښتون ضدو سياستونو سرسخت منتقد و، چې د پاکستان پوځ له څو کلونو راهيسې بندي کړی او د محکمو له لوري يې د خوشې کیدو له څو پریکړو سره بیا هم خوشې کیدو ته نه پرېږدي.

د ښاغلي وزير د خوشې کیدو لپاره په لسګونه ځله پاکستان او نورو سيمو کې سلګونه زره پښتنو لاریونونه کړي، خو غږ يې نه دی اورېدل شوی.

پښتانه ملتپال په دې اړه د بشري حقونو پر نړیوالو مدافع ادرسونو هم د نه پاملرنې له امله نیوکې لري.