تاند، چهارشنبه، د ثور ۳۱ مه: تاند ته د حکومت باوري سرچینئ ویلي، چې د افغان سولې لپاره د امریکا ځانګړی استازی زلمی خلیلزاد د طالبانو او امریکا تر منځ د افغان سولې د هوکړې د پرمختګ او د بین الاافغاني خبرو د پیل لپاره د دوحې له سفر وروسته کابل ته رسېدلی دی.
په پام ک ده چې زلمی خلیلزاد به په کابل کې له افغان ولسمشر محمد اشرف غني د مصالحې عالي شورا د مشر عبدالله عبدالله او له پخواني ولسمشر حامد کرزي سره په جلا جلا ډول وګوري.
دی به د افغان سولې د هوکړې پرمختګ او د بین الاافغاني خبرو د پیل په هڅو بحثونه وکړي.
تر دې وړاندې د امریکا د بهرنیو چارو وزارت هم په خپله خپره کړې اعلامیه کې ویلي وو، چې خلیلزاد به د دوحې او کابل سفر په لړ کې له افغان چاراکو سره د بین الافغاني مذاکراتو د ژر تر ژره پیل هدف خبرې وکړي.
امریکا تر اوسه د دوحې د لیدنو جزیات نه دي خپاره کړي خو وايي، دغه هیواد د افغان کشالې د غوره حال لپاره د ټولو لوریو په راټولولو ټینګار لري او هڅه هم ورته کوي.
دا په داسې حال کې ده چې افغان حکومت د سولې په مخه کې خپل لوی خنډ هوار کړی او عبدالله عبدالله سره یې د روغې جوړې په ترڅ کې هغه د مصالحې شورا رئیس ټاکلی دی.