تاند(چهارشنبه، د قوس ۲۳مه) د تاجکستان ولسمشر امام علي رحمان نن په دوه ورځني سفر اسلام اباد ته ځي.
د پاکستان د بهرنیو چارو وزارت له خبرپاڼې سره سم، له پاکستاني چارواکو سره د امام علي رحمان په کتنو کې به پر دوه اړخیزو همکاریو او د هغو پر لا پراختیا خبرې وشي او همداراز ټاکل شوې ده چې د تاجکستان او پاکستان ترمنځ څو دوه اړخیزې موافقې لاسلیک شي.
تاجکستان د پخواني شوروي اتحاد د منځنۍ اسیا په هیوادونو کې د جغرافیوي موقعیت له نظره تر ټولو نژدې دی. یوازې د واخان تړانګه د دوو هیوادونو ترمنځ پرته ده.
سره له دې چې ظاهراً پاکستان په افغانستان کې د طالبانو د حکومت دوست او تاجکستان یې مخالف دی خو په عین حال کې داسې راپورونه هم شته چې د دواړو هیوادونو په منځ کې د افغانستان پر سر د نظرونو د یووالي ټکي مخ په زیاتېدو دي.