تاند:( چار شنبه، د قوس درويشتمه) د طالبانو د حاکمې ادارې د تدارکاتو کمېسیون لومړۍ غونډه د ریاست الوزراء د اقتصادي مرستیال ملا عبدالغني برادر په مشرۍ جوړه شوه.
د نوموړي د دفتر په یوه اعلامیه کې راغلي، چې په غونډه کې ملا برادر له ګډونوالو د تدارکاتو پروسې پرمخ بېولو کې د ګډې همکارۍ غوښتنه وکړه.
سرچینه زیاتوي:« هغه پروژې چې ملي تدارکاتو ادارې ته وړاندې شوي وو، د ۷ پروژو قراردادونه د ملي تدارکاتو کمېسیون له لوري منظور، د ۱ پروژې قرارداد وځنډول شو او د پاتې ۵ پروژو قراردادونه چې د فسخې غوښتنه یې شوې وه، فسخه شول. دغه قراردادونه د توکيو د خریدارۍ په ګډون د خدماتو او بیارغونې د پروژو وو.»
د سرچينې د معلوماتو له مخې، د غونډې په پای کې پرېکړه وشوه چې له دې وروسته هېڅ اداره نه شي کولای د ملي تدارکاتو کمېسیون له منظورۍ پرته خپلې اړوندې پروژې په قرارداد ورکړي.
ملا برادر ویلي، ټولې ادارې مکلفې دي چې د خپلو پروژو قراردادونه د ملي تدارکاتو ادارې له لارې د کمېسیون له منظورۍ وروسته لاسلیک کړي.
د يادونې وړ ده، چې د طالبانو امیرالمؤمنین ملا هبت الله اخندزاده پرون د تدارکاتو کمیسیون بیرته احیا او ملا برادر اخوند ورته د مشر په توګه اعلان کړ.